Yahoo奇摩 網頁搜尋

宋應星（1587年 - 1666年?），字長庚，南昌府奉新縣北鄉雅溪牌坊村人。佢係明朝好有名嗰科學家。 宋應星寫嗰《天工開物》箇本17世紀嗰百科全書容得許時間大量嗰科學技術門類，裡頭就有火藥武器箇滴子尖端武器、技術嗰介紹。佢到歷史上舞出嗰巨大成就，𠵹佢有時間會拕人跟法國嗰科學家狄德羅比得一起，話宋應星係「中國嗰狄德羅」。

利瑪竇住嘚南昌嗰經歷係話意大利傳教士、學者利瑪竇到公元1595年6月-1598年6月嗰箇段時間裡頭住嘚南昌嗰經過歷程。居昌嗰期間，佢通過兵部侍郎石星嗰好友王繼樓醫生，結識到許時間江西嗰社會名流，像建安王朱多㸅、樂安王朱多焿、江西巡撫陸萬垓、南昌知府王佐、文學家李日華、理學家章潢箇滴子南昌嗰上流人物。佢也短得機會就刊發關於西方宗教知識嗰書冊，末後佢都拕邀請到江西第一學府——白鹿洞書院進行講學活動，做起中國嗰第三間教堂——「聖堂」。

古羅馬嗰貨幣係話由羅馬共和國到羅馬帝國嗰西半部份，即公元前4世紀-公元11世紀箇段時間裡頭建立嗰金屬貨幣體制。佢攏共有金質嗰奧婁斯、銀質嗰德拿留斯、青銅質嗰色斯特州斯同得都潘州斯、黃銅質嗰阿斯箇滴子貨幣。古羅馬嗰貨幣到拕希臘影響嗰地區都係通行得正嗰，仲怕佢俚有自簡嗰貨幣系統。 公元3世紀過後，德拿留斯拕安鐸尼年努斯頂替，末後安鐸尼年努斯自簡也到貨幣改革裡頭拕銀質嗰阿根透斯、青銅質嗰霍利斯頂替吥位置。箇之後，羅馬帝國嗰主要貨幣都係金質嗰所利都斯同得別滴子青銅質地嗰細零毫子。

南昌貢院係江西古時間舉行科舉鄉試嗰考場所在。到1905年科舉制度拕廢吥以前，全贛嗰秀才會三年一到嗰來南昌貢院參加比試，考中及第嗰就係「舉人」，頭名舉人稱「解元」。 江西人歷來作興讀書，盛行業儒之風，因為江西自身地狹人稠，科舉就有提供嘚一般人登科出仕嗰社會功用。《西園雜記》裡頭話南昌府「市井多儒雅之風」，吉安府「環吉水百里之疆多業儒」，廣信府「下逮田野小民生理裁足，皆知以課子孫讀書為事」，故係封建時代有「翰林多吉水，朝士半江西」嗰話法。

江西嗰民居主要拕分做贛派建築、徽派建築、客家圍屋三隻主要嗰組成形式，也係江西嗰傳統文化裡頭嗰重要內容。江西三面環山、北首臨江嗰獨特地理環境舞得江西嗰本地建築有鮮明嗰自身特色，佢到居住嗰編制等級、建築嗰大細規模、選址嗰風水觀念也都形成自簡嗰一套文化屬性。

贛粵運河係條規劃嘚嗰運河，佢計畫搦長江同得珠江連合，北起九江嗰鄱陽湖口，走贛江，路過南昌、吉安、万安、贛州進桃江，卡過分水嶺入廣東，順得湞水經過南雄、韶關，一徑抵達廣州嗰珠江出海口。 贛粵運河攏共有1237公里𠵹莽，江西境內會占得759公里，係總長嗰61%左右。

阿歷山德·麥琨（英文：Alexander McQueen），1969年3月17號出世，2010年2月11號過身，係隻英國嗰時裝設計師。佢嗰設計風格異於常俗、手法獨到新穎，故係有「Enfant terrible」（狼犺崽）嗰叫法。 阿歷山德·麥琨先頭擔任過嗰五年Givenchy嗰首席設計師，末后創立自簡擁有嗰高級訂製品牌Alexander McQueen同得McQ。憑得佢嗰天才設計，Björk、Lady Gaga、Rihanna都係佢嗰客戶群，更假四年拕選做嗰「英國年度設計師」（British Designer of the Year）。

冕服係古時間代表得至高禮制嗰衣著體系，係皇帝嘚祭拜天地、宗廟、正旦、聖節等禮祀活動裡頭著嗰衣裳。完套嗰冕服主要含得冕冠、衣裳（上衣、中衣、下裳）、袴、襪、舄、腰帶（革帶、大帶）、蔽膝、佩玉、綬、劍、圭等構件。冕服嗰「形制」依得佢俚嗰款式、色氣、大細，拕分成不同等級，形成國家嗰正式典章制度，箇就係「以禮為服制」。 冕服係王公貴胄嗰專有服飾，不同等級嗰貴族又拕配以不共樣嗰冕服，皇帝也揸得出席場合嗰不同穿著相配嗰冕服。冕服制度嗰奠定係華夏人中央集權社會嗰象徵。各自利益集團形成差別等級、階層，承認自簡所屬嗰價值地位。天子通過箇隻等級秩序統治四方，佢嗰服飾搦佢同得別嗰社會人群區分開，係下底人不得僭越嗰規章。

《To Autumn》（《至秋》）係英國浪漫主義詩人吉茨嗰一首詩。箇隻作品嘚1819年9月19號寫正，第年發表嘚吉茨嗰詩集裡頭。《To Autumn》係吉茨嗰「1819年 六大俄打」嗰最晏嗰詩作。箇首詩有三隻詩節，每隻詩節有一十一行韻文，描述季節嗰進程變化，由作物嗰晏熟到大收再到秋末冬來嗰許幾日。詩作通過對秋天嗰擬人化、收穫嗰豐産、視聽嗰感官，表現出豐富嗰想像力。《To Autumn》拕評做英語最精彩傑出嗰短篇詩之一、英語抒情詩最常刊選嗰作品之一。